مازلت أعيش حالة من التعجب وعدم القدرة على التصديق هل فعلا أصبحت أبا لمخلوقين أحبهما، فللمرة الثانية أقف أمام معجزة الله وآيته في أن يهبني من الأولاد ياسين بعد أن رزقني منذ عامين تقريبا بحبيبة.

شعور مختلف يقف على كاهليك وأنت في منتصف العقد الثالث من حياتك، 25 عشرين عاما بمقياس العصر الذي نعيشه هو بداية لمجرد التفكير بجدية في الإرتباط بشريكة الحياة؛ لكن أن أكون أبا لحبيبة وياسين، أصبحت مثارا لاصدقائي فالبعض يحسدني وآخرون يضحكون.

لكن الحقيقة أن حياتك أصبحت مختلفة عن بقية أصدقائك، نعم هناك متعة لكنها أصبحت مختلفة.

لا للخروج

الاجازة القادمة سيذهب الجميع في رحلة أعد لها العمل، وبعد أن حجزت فيها مقعدين، تراجعت.. لا مشكلة؛ فالأولاد عندهم برد ومش هيقدروا يطلعوا الرحلة.
طبعا والحمدلله اصابة الاولاد بالبرد من السنن الواجب عليك انك تبقى عارفها وانهم ممكن يتعرضوا ليها، حتى من غير أسباب أنت تكون عارفها ولازم تتحرك بسرعة لعلاجهم وتكون تحت إشراف الطبيب.

وزي الرحلات كل الخروجات هتتلغي في أي لحظة عشان الأولاد. ودى من المواقف اللي ممكن تعدي عليك وتاخد قرارك فيها من غير تفكير لان الموضوع متعلق بصحة الاولاد، وزيها حاجات كتيرة ممكن تمر عليك في حياتك.

وفر لفلوسك

تخيل مثلا أن الأولاد في السن من الولادة وحتى سن 5 سنوات تقريبا كل أربع شهور حجم جسمهم بيتغير، وبناءا عليه يا شاطر لازم تظبط أمورك وتمشي نفسك بحيث انك تقدر تغطي مصاريفهم. كمان لازم تبقى عارف أنهم في الأكل لازم تكون محافظ عليهم، يعني في وجابتهم تكون محافظة على التنوع الغذائي الصحي عشان أجسامهم تكون صحية وتقدر تقاوم الامراض والفيروسات.
وطبيعي جدا يكون تفكيري وانا واقف في الصيدلية بدل ما افكر أجيب كريم شعر او برفان معين؛ لازم يكون تفكيري في نوع البامبرز والسيريلاك واغذية الاطفال.

طبعا مصاريفهم عادة هتخليك لوحدك تلغي أي رحلات حتى لو بيعملها الشغل وتكلفتها بتتخصم من مرتبك على اربع شهور، هيكون كفاية جدا رحلة في السنة وممكن يبقى ليها بديل وبالتالي لن تتمكن من الذهاب في اي رحلات.
طبعا لا أقصد التعقيد، لانهم لما يوصولوا لسن 3 سنين هتبقى عايز تطلع كل يوم رحلة عشان يفرغوا الطاقة اللى عندهم في شيئ إيجابي مش سلبي، وبالتالي هتكون مستمتع.
وفي هذه الحالة، لازم تعتني بالأولاد لأن زوجتك كفاية عليها طول الاشهر الماضية وإرهاق الاولاد، المفروض انها تسترخي في الاجازة، اجري العب واعمل كل اللى نفسك فيه بس مع الاولاد.

لون الحياة بيتغير وبيتحس بمتعة مختلفة، لازم تحبها وتبدأ تتكيف معها.
حتى المواصلات اللى كانت بتعذبك لم تعد موجودة، لانك هتركب تاكسي وفقط، لا مكان في حياتك لغيره لا باصات ولا متروهات ولا اي حاجة تانية.. طبعا كله بسبب وجود الأولاد معك.

وبالتالي أصدقائي لما بيحبوا يدخروا فلوس بيكون هدفهم موبايل او لاب توب ومنهم ناس بتفكر في سيارة، لكن أنا الحمدلله مفيش ادخار ولو فيه هيكون تفكيري كله في احتياجات الاولاد، لبسهم وأكلهم و أيضا مدارسهم وتعليمهم.

حكم كتير

أكثر ما تعملت من أولادي، أني مبقتش خايف من حكاية الفلوس وبقى عندي يقيين أن الله هو الرزاق ذو القوة المتين، وانه مدام ربك قدّر انه يرزقك بولد فاعرف انه رزقه جاي ولا تقلق، متنساش الاسباب لانها السبب في ايتيان الرزق.

قد لا أكون قد تعلمت كيف أصبح أبا، ومازلت أعمل على الاستعانة بوالدي، كيف سأصبح انا الأب؟؟.

وهنا أبدأ بالتحسس بفكرة القدرة والمقدرة والإستعداد والتعلم والفطرة.. أيوة الفطرة اللى في الاخر دي مهمة جدا، لاني اكتشفت انك لما تكون اب ان تكون محتاج تحصل على دورات ولا تتهيأ نفسيا وبدنيا زي ما في ناس بتعتقد، الحقيقة المهمة ان تكون مقرر انك تتحمل مسئولية أشبالك الصغار يا اسد.

الحاجة التانية اللى حسيت فيها بنعمة ربنا عليا، اكتشفت لاى حال أبويا وامي زرعوا فيا صفات تخلينى اقدر اتعامل مع ولادي، وكأن مشاهدتي لابويا تدريب عملي ليا عشان لما ابدأ اتعامل مع ولادي، وكلما كان والديك مهتمين بك.. كانت قدرتك على الاهتمام باولادك، فالعلاقة طردية.

كمان في حاجة مهمة بتبدأ تتغير فيك، طريقة تفكيرك، بيبدأ يكون عندك أفق مختلف لكل الأمور، وبتبدأ تحسب كل صغيرة وكبيرة لكن مهم جدا أنك تتعامل مع كل حاجة بتفكر فيها بموضوعية وعقلانية، وبلاش تهرب من اللى بتفكر فيه بحاجات تخليك تبعد عن الصح اللى المفروض تعمله لصالح ولادك وعيلتك.

أوعى يا صديقي تفكر انك كده كبرت وخلاص.. لأ.. دايما هتكون محتاج نصيحة الاكبر منك، ودايما لازم ترجع للعيلة الكبيرة ولا تنسى انك جزء من كل.