الجميع يحلم بمقابلة بن لادن أو الظواهري ويمكن يشرف بمقابلة بوش ، أو حتى رئيس جمهوريتنا المفدى ، لكن لأننا تعودنا سطوة الرؤساء فقد كلفت بعمل حوار غير متوقع أنه حوار مع "الجزمة" !!! نعم الجزمة أكرمكم الله .بعدما أصبحت نجم هذا الزمان .

تلك الجزمة التي تحولت من ضرورة لا يمكن الاستغناء عنها ، إلي دليل طبقي ، فإذا كانت غالية ومن ماركة فإنها ترسم لك شخصيتك.. وإن كانت منخفضة العسر ولكن يبدو عليها القيمة واللمعة فتصبح من أصحاب الشياكة، أما إذا كنت من أصحاب الجزم المقطعة فالله يعطينا ويعطيك . المرعب في الأمر أن الجزمة المطلوب منى عمل الحوار معها هي تلك التي يرتديها الجندي في معركته أو عسكري الأمن المركزي في مواجهته مع الإصلاحيين.   

منذ الوهلة الأولي لرؤيتها شعرت بالخوف والتردد خاصة وأنها صاحبت الرصيد الأكبر من الآثار المحفورة علي جسد أصدقائي..  واستجمعت شجاعتي وقررت التودد إليها عبر فراشة زادتها لامعانا واستأثرت عطفها ، ومن هنا بدأت حواري معها بعيدا عن السياسة وكيف صارت لنا حذاءا ؟
- أيها الإنسان أنت من جعلتني حذاءا لك يوم أن علمك الله أن تحمى رجلك من أذى الأرض من حيوانات ومن صخور ومن حرارة ومن برد .
- إذن لك مهمة عظيمة ؟!!
- طبعا وإلا لما دلَك الله الخالق عز وجل علي .
- وما سبب تحولك الفظيع من حماية الإنسان إلى إهانته  ؟
- الإنسان نفسه .
- كيف ؟
- إنسانكم الحاكم بأمره أصبح لا يعرف قيمة بنى البشر من حوله وبالتالي لايهمه إن ضرب أم لا وحتى عذب ومات .
- وأين دورك ؟
- أي دور تقصد أنا لست إلا أداة رزقك الله بها حتى تستطيع العيش بسلام .
- والحل ؟
- أن تعاد صياغة تلك العقلية البشرية التي تستخدمني .

- ممكن تصوري لنا ما حدث في الخمسان السود الماضية .
- هو بالنسبة لي بداية يوم كأي يوم خرجت في رِجل الرجالة وطبعا أنا مليش دعوة وهما واقفين قدام المحكمة جه ناس قاعدين يصرخوا ويقولوا كلام كبير، هو طبعا معرفوش بس متهيألي بيقولوا كلام يخدم البلد .

- وبعدين ؟
- متهيألي كمان إننا والعساكر المفروض إننا بنحميهم ونحدد مكان عشان نحافظ عالمرور.

- أمال إيه اللي حصل ؟
- سمعت بعض الضباط بيقولوا إن في أوامر من فوق لفركشة العيال دول .
- ليه ؟
- عرفت أنهم راكبين دماغهم وبتظاهروا للتضامن مع القضاة والحكومة مش ناقصة الشعب يتحد مع القضاة كمان .

- وإيه المشكلة في كده ؟
- أصلهم عارفين أن الإصلاح جاى جاى سواء الحكومة وافقت أو لا وهما بيحاولوا يمطوا الموضوع ده أطول فترة ممكنة .
- طيب نرجع لموضوعنا تانى .. ليه اللي حصل ؟
- لما الشباب بتوع الإخوان وكفاية أتجمعوا وهما بيهتفوا عشان القضاة جات الأوامر من فوق أن العساكر تصرف معاهم ومش عايزين يبان أن في متظاهرين .
- وبعدين ؟
- الضباط بدأوا يطلبوا من العساكر أنهم يمسكوهم وعشان يكونوا عبرة لغيرهم ويكون الموضوع اكبر يضربوهم .
- والعساكر عملوا إيه ؟
- العساكر دول غلابة بيسمعوا الكلام وإلا مصيرهم هيكون زى مصير احمد زكى في فيلم البرئ .
- إيه ده أنت بتسمع أفلام كمان ؟
- طبعا وبكون البطل ساعات زى يوم الخميس .

- أيوة إيه اللي حصل بقي ؟
- جات الأوامر بضرب ويا ريت الضرب ميتركش أية آثار وبالتالي العساكر استخدمونا إحنا .
-كيف تري من تقوم بضربهم ؟
 أنهم شرفاء هذا المجتمع …
- وما هو شعورك وأنت بتضرب الشرفاء كما تصف ؟
- أنا كنت حزين طبعا إني بينضرب بي الشرفاء بس أنا أداة في رِجل العساكر أنا مليش ذنب .
- والحل ؟
- أنا قلت اقبل كده إن الحل في أن اللي بيحكمكوا يغير فكره أو يتغير.
وفجأة وبدون مقدمات وأنا واقف بكمل الحوار صدر الأمر العسكري بضرب واعتقال الجزمة التي خرجت عن صمتها .
صرخت في وجهي الله يسامحك شفت اللي حصلي بسببك يارتني ما تكلمت  عرفت بقي يا سيد إن النظام بتاعكو ملوش حل غير انه يتغير.
أنا قررت إني انشر القصة والحوار زى ما هو !  عشان لا أجد نفسي بنضرب بالجزمة أو محبوس معاها.